ҚР СІМ-де БҰҰ мүгедектер құқықтары жөніндегі Конвенцияның орындалуын бақылау жөніндегі Дөңгелек үстел өтті

2019 жылғы 14 қарашада Қазақстан Республикасы Сыртқы істер министрлігінде ҚР СІМ Ерекше тапсырмалар жөніндегі елшісі Үсен Сүлейменнің төрағалығымен «Қазақстан инклюзивті қоғам қалыптастыру жолында» тақырыбында дөңгелек үстел өтті. 

Іс-шара 2015 жылы ратификацияланған БҰҰ-ның мүгедектер құқықтары туралы Конвенциясының ережелеріне қол жеткізудегі прогресті бағалаудың тәуелсіз мониторингтік тетігін Қазақстан Республикасында енгізу мүмкіндігін талқылауға бағытталған.

Бақылау тетігін құру Конвенцияның 33-2-бабында көзделген, алайда халықаралық шарттың ратификацияланған сәтінен бастап Қазақстанда осы тетіктің қандай болуы тиіс екендігі бойынша жан-жақты пікір алмасу өтпеді. 

Талқылауға ҚР Парламентінің депутаттары А.Қапбарова мен Д.Нөкетаева, ҚР Адам құқықтары жөніндегі уәкіл Э.Әзімова, ҚР мүдделі мемлекеттік органдарының мүгедектігі бар адамдарға көмек көрсету саласында жұмыс істейтін қазақстандық үкіметтік емес ұйымдардың өкілдері қатысты. Халықаралық сарапшылар ретінде дөңгелек үстелге БҰҰ Мүгедектер құқықтары жөніндегі комитетінің мүшесі М.Шефер және Финляндиядан келген үкіметтік емес ұйымның басшысы Т.Тууре шақырылды. Іс-шараға ЕҚЫҰ, БҰҰДБ, БҰҰ АҚЖКБ, БҰҰ Халық саласындағы қоры кеңселерінің, Сорос қорының және Қазақстандағы АҚШ Елшілігінің өкілдері қатысты.  

Дөңгелек үстел барысында Конвенцияға сәйкес бақылау тетігінің екі нұсқасы ұсынылды: Адам құқықтары жөніндегі уәкіл кеңсесі жанындағы мониторингтік механизм және жеке ұлттық мониторингтік палатаны құру. Тараптар нұсқаны да, сондай-ақ адам құқықтарын қорғау мен көтермелеумен айналысатын ұлттық мекемелердің мәртебесі мен жұмыс істеуіне қатысты Париж қағидаттарына жауап беретін қосымша нұсқаларын мұқият зерделеу қажеттігі туралы пікірге келді.   

Іс-шара «Шырақ» мүгедек әйелдер ассоциациясы» ҚБ-мен бірлесіп ұйымдастырылды.

Қосылған : 16.11.2019, 11:00, Өзгертілген : 16.11.2019, 11:00